Takatakatakatak!
Ang lagatak ng kahong hawak-hawak
laman ay yosi at kending sangkatutak.
Ialok sa lahat nang may buong galak.
Takatakatakatak!
Tatak ng tunong na humahatak
upang may barya namang pumatak
sa loob ng kahong putak nang putak.
Takatakatakatak!
Palakpak ng kahong pumapalatak
kapit ng bisig na sa pawis ay tagaktak
sa gitna ng kalye, ang init ay sumusulak.
Takatakatakatak!
Iyak ng kanina pang talak nang talak.
Bumili na ang lahat ng may balak
pampasak sa sikmurang nagnanaknak.
Takatakatakatak!
Ibigay na ang inyong baryang latak
upang ang hamak na kahon ay humalakhak
at makapagpahinga na, sa gilid ay sumalampak.
Walang komento:
Mag-post ng isang Komento